Этүгэн их сургуулийн 2015, 2016, 2019, 2020 оны төгсөгчдийн “Инновац: Хөгжлийн боломж” нэгдсэн форум 2025 оны 11 дүгээр сарын 29-нд амжилттай болж өндөрлөлөө. Энэхүү төгсөгчдийн форумыг 2 жил тутамд зохион байгуулдаг бөгөөд Этүгэн их сургуулийн хөгжлийн алсын хараа, боломж, хөгжил шинэчлэлийг төгсөгчдөдөө танилцуулж, хамтын ажиллагааг өргөжүүлэх, эргэх холбоогоо бэхжүүлэх зорилготой юм.

Ректор Б.Батсэрээдэнэ болон Төгсөгчдийн холбооны тэргүүн Б.Нинжбадгар нар мэндчилгээ дэвшүүлж, нээлтийн үг хэллээ.

Удирдах зөвлөлийн дарга, академич С.Нямзагд “Этүгэн өнгөрсөн ба ирээдүй” илтгэлээр сургуулийн хөгжил, стратеги, ирээдүйн боломжийг төгсөгчдөдөө хуваалцав.

Мөн Эрдэм шинжилгээ, инновац, гадаад харилцаа эрхэлсэн дэд захирал Б.Насанбаяр Этүгэн их сургуулийн Эндаумент сангийн зорилго, ач холбогдол, хамтын ажиллагааны боломжуудын талаар танилцуулга мэдээлэл хүргэлээ.

Төгсөгчид Анагаах ухааны тэнхим, Нүүр ам судлалын сургууль, Сувилахуйн сургууль, Био-Анагаахын тэнхим, Эм зүйн тэнхим, Уламжлалт анагаах ухааны тэнхим, Эдийн засаг, менежментийн тэнхим, Инженер, технологийн сургуулийн Этүгэн инновацын үзэсгэлэнтэй танилцлаа. Төгсөгчид сургууль, тэнхимийн инновацын үзэсгэлэнгээр зочлон багш, судлаачид, оюутнуудын бүтээл, мэргэжлийн хөтөлбөр, судалгааны чиглэл, төслийн үр дүнтэй дэлгэрэнгүй танилцсан нь форумын онцлох хэсэг байв.

Форумын төгсгөлд сургууль, тэнхим төгсөлтийн дараах богино хугацааны багц цагийн сургалтууд зохион байгуулсан бөгөөд төгсөгчидтэйгээ нээлттэй ярилцлага өрнүүлж, цаашид хэрэгжүүлэх санаа шийдэл, хамтран ажиллах боломжийн талаар санал сэтгэгдлээ хуваалцан, харилцан туршлага солилцлоо.

Мөн форумд оролцсон төгсөгчдөдөө Этүгэн их сургуулиас Төв бассейны нэг сарын эрх бэлэглэв.

Форумыг Этүгэн их сургуулийн Төгсөгчдийн холбоо хамтран зохион байгуулсан бөгөөд холбооны тэргүүн Б.Нинжбадгар, Био-Анагаах ухааны салбар зөвлөлийн дарга Т.Бадамсэд, Инженер, технологийн салбар зөвлөлийн дарга Ц.Хосбаяр, Уламжлалт анагаах ухааны салбар зөвлөлийн дарга А.Мөнхбаяр, Анагаах ухааны салбар зөвлөлийн дарга П.Батчулуун, нарийн бичгийн дарга Б.Амгаландарь нарын гишүүд бүрэн бүрэлдэхүүнээрээ оролцлоо.

Хүрэлцэн ирсэн нийт төгсөгчид, эрдэмтэн багш нар, сургуулийн удирдлагуудад талархал илэрхийлье.

 

 

1/65