Этүгэн их сургуулийн Төгсөгчдийн холбооны санаачилгаар анх удаа зохион байгуулагдсан “Этүгэн-Ёс зүй” сэдэвт анхдугаар форум 2023 оны 11 сарын 24-ны амжилттай боллоо. 

Форумыг нээж ЭИС-ийн үүсгэн байгуулагч, Удирдах зөвлөлийн дарга, Академич С.Нямзагд сургуулийнхаа хөгжил, дэвшлийг танилцуулсан “Этүгэн их сургууль - Өнгөрсөн ба ирээдүй” сэдвээр илтгэл тавьсан ба үргэлжлүүлэн ЭИС-ийн Хүний их эмч мэргэжлийн 2015 оны төгсөгч, Монголын Анагаахын хиймэл оюун ухааны холбооны ерөнхийлөгч, Дэлхийн шилдэг 100, Их Британийн шилдэг 10 сургуулийн нэг болох Бристолын их сургуульд Чевенингийн тэтгэлгээр Цахим эрүүл мэндийн магистрын хөтөлбөрт суралцагч Б.Баярбаатар цахимаар холбогдон “Хиймэл оюун ухааны хэрэглээ ба өнөөгийн байдал”, ЭИС-ийн ректор, доктор, профессор Б.Батсэрээдэнэ “Мэргэжлийн имиж бүрдүүлэлт” сэдвээр илтгэл тавьж, тухай бүр мэргэжлийн оролцогчид хэлэлцүүлэг хэлэлцүүлэв.

Мөн анхдугаар форумын гол сэдэв буюу “Төгсөгчдийн холбоо-Цаашдын үйл ажиллагаа” сэдвээр салбар бүрийн төгсөгчдийн холбооны тэргүүлэгч нар оролцож, харилцаа холбоогоо хэрхэн сайжруулах, шинэхэн төгсөгч болон төгсөх гэж буй оюутнуудаа ажил, судалгаа шинжилгээ, төсөл хөтөлбөрүүдэд хамруулах гарцын талаар үр бүтээл дүүрэн ярилцаж өнгөрүүлэв. Мөн өөрийн сонирхож буй чиглэлдээ хугацаа алдалгүй суралцах боломжтой “Хос, хавсарга хөтөлбөр”, төгсөгчдөдөө зориулан хөгжүүлсэн EDULITE цахим сургалтын программыг танилцуулав.

Монгол фарм ХХК захирал Л.Даваа: Энэхүү сайхан форумын үеэр Этүгэн их сургуультай оюутан дадлагажуулах гэрээ байгуулж байгаадаа туйлын баяртай байна. Манай компани 80 гаруй ажилтантай бөгөөд түүний 50 орчим хувь нь энэ сургуулийн төгсөгчид байдаг. Этүгэний хамт олонд маш сайн боловсон хүчин бэлтгэж байгаад баярлалаа.

Мөн форумын үеэр “Монгол фарм” ХХК, Ачит чагнуур ӨЭМТ, Кидней кэйр, “Агь медикал” эмнэлэг, “Дижитал гранд” ХХК зэрэг 10 гаруй байгууллагатай оюутан дадлагажуулах, хамтран ажиллах гэрээ байгуулав.

Энэхүү форумд Этүгэн их сургуулийн нийт 2000 гаруй төгсөгчдийн үе үеийн төлөөлөл 200 гаруй төгсөгчид оролцож, нэгэн өдрийг үр бүтээл дүүрэн өнгөрүүлсэн ба арга хэмжээний  төгсгөлд төгсөгчдийн төлөөлөл багш, тэнхимтэйгээ халуун дотноор уулзаж, багш нарынхаа, сургуулийнхаа хичээл зүтгэлд талархал илэрхийлэв.

Форумын үеэрх зургийг ЭНД дарж үзнэ үү.